Алматы қаласындағы №4 Перзентханада жаңа туған нәрестелерге фототерапия жүргізуге мүмкіндік бар.
Қызмет күндізгі стационар форматында көрсетіледі. Нәресте фототерапиядан неонатологтардың бақылауымен өтеді, қажет болған жағдайда қандағы билирубин деңгейі тексеріледі.
Ата-аналар сәбиімен бірге перзентханаға келіп, белгіленген уақыт аралығында фототерапия алады және ем аяқталғаннан кейін үйіне қайтады.
Маңызды: фототерапияны өз бетінше бастауға немесе үй жағдайында медициналық көрсеткішсіз фотолампа қолдануға болмайды. Емдеу қажеттілігі мен оның ұзақтығын дәрігер нәрестенің жағдайына және билирубин деңгейіне қарай анықтайды.
Нәрестелердің сарғаюы туралы
Жаңа туған нәрестелердің сарғаюы — өмірдің алғашқы күндерінде жиі кездесетін жағдай. Ол қанда билирубин деңгейінің жоғарылауынан пайда болады. Көп жағдайда физиологиялық сарғаю өздігінен басылады. Алайда кейбір жағдайларда билирубин шамадан тыс жоғарылап, нәрестенің денсаулығына қауіп төндіруі мүмкін.
Сондықтан сарғаюды тек терінің түсіне қарап бағалау жеткіліксіз. Қажет болған жағдайда дәрігер билирубин деңгейін арнайы талдау арқылы анықтайды.
Сарғаюды қалай емдейді?
Егер билирубин деңгейі емдеуді қажет ететін көрсеткішке жетсе, негізгі емдеу әдістерінің бірі — фототерапия. Арнайы медициналық жарық билирубиннің ағзадан шығарылуын жеңілдетеді.
Емдеу ұзақтығы әр балада әртүрлі. Ол нәрестенің жасына, туған кездегі жүктілік мерзіміне, билирубин деңгейіне және басқа да факторларға байланысты белгіленеді.
Неліктен дер кезінде емдеу маңызды?
Билирубин деңгейінің шамадан тыс жоғарылауы жүйке жүйесіне зиян келтіріп, ауыр асқынуларға әкелуі мүмкін. Сондықтан нәрестенің сарғайғанын байқасаңыз, дәрігерге уақытылы қаралу маңызды.
Балаңыздың терісі немесе көзінің ағы сарғайғанын байқасаңыз, уақыт жоғалтпай маманға жүгініңіз. Сарғаюды ерте анықтау және билирубин деңгейін бақылау — асқынудың алдын алудың маңызды қадамы.
