Алматы қаласындағы №4 перзентхананың директорының орынбасары, жоғары санатты акушер-гинеколог дәрігер Екатерина Викторовна Самарцевамен сұхбат:
— Екатерина Викторовна, неге босанғаннан кейін әйел денсаулығына ерекше көңіл бөлу маңызды?
— Босану – әйел ағзасы үшін үлкен сынақ. Әйел орасан зор физикалық әрі эмоционалдық күш жұмсайды. Сондықтан бұл кезеңді жай өткізбей, толыққанды қалпына келу аса маңызды. Босанудан кейінгі уақыт – болашақ репродуктивті денсаулықтың іргетасы. Көп жағдайда әйелдер: «босану сәтті өтті, демек бәрі жақсы» деп ойлайды. Бірақ олай емес. Ағзада болатын өзгерістер жасырын болуы мүмкін, айқын белгілері байқалмайды. Сондықтан уақытылы кешенді тексеруден өту – асқынулардың алдын алудың негізгі жолы.
— №4 Перзентханада «Босанудан кейінгі денсаулық» бағдарламасы енгізілген екен. Ол не үшін қажет?
— Бұл қызмет әйелдің босанудан кейінгі ағзалық жағдайын толық бағалауға мүмкіндік береді. Өзінің денсаулық және босану тарихын білетін мамандардың бақылауында болу – әйелге сенімділік сыйлайды. Бұл жай ғана анализдер жиынтығы емес, кешенді тәсіл: зертханалық диагностика, кіші жамбас ағзаларының УДЗ-сы, гинеколог кеңесі. Мұндай чекап ауытқуларды дер кезінде анықтап, қалпына келу процесін түзетуге және келесі жүктілік кезеңдерге нақты ұсыныстар беруге көмектеседі.
— Мұндай тексеруден әйел босанғаннан кейін қай уақытта өткен дұрыс?
— Ең қолайлы кезең – босанғаннан кейінгі алғашқы 6–8 апта. Бұл – ағза белсенді түрде қайта қалпына келетін «алтын уақыт». Дегенмен, одан кейін де етеккірдің бұзылуы, ауырсынулар және тағы басқа өзгерістер байқалса тексеруден өту маңызды. Ең бастысы – уақыт созбау керек. Себебі, көптеген процестерді ерте кезеңде түзету әлдеқайда жеңіл.
— Алдымен қандай көрсеткіштерге назар аудару қажет?
— Қан түзу жүйесі, бауыр мен бүйрек жұмысы, зат алмасу, гормондық тепе-теңдік, кіші жамбас ағзаларының жағдайы. Біз гемоглобин деңгейін, қабыну белгілерін, бауыр мен бүйректің қызметін тексереміз, УДЗ арқылы асқынуларды болдырмауға тырысамыз. Мұның бәрі әйелдің жалпы жағдайына ғана емес, репродуктивті денсаулығына да тікелей әсер етеді.
— Сонда босанудан кейінгі тексеру келешектегі жүктілікке де көмектеседі ғой?
— Дұрыс айтасыз. Босанудан кейінгі чекап – бұл алдын ала дайындықтың алғашқы қадамы. Егер әйел тағы да жүкті болуды жоспарласа, ең алдымен ағзасының толық қалпына келгеніне көз жеткізуі тиіс. Бұл асқыну қаупін азайтады, сәтті ұрықтану мен жүктілікті аман-есен көтеріп шығуға ықпал етеді.
— №4 перзентханадағы «Босанудан кейінгі денсаулық» бағдарламасына не кіреді?
— Біз әйелдерге кешенді тексеру ұсынамыз, оған мыналар кіреді:
- Жалпы қан талдауы (гемоглобин, эритроцит, лейкоцит формуласы, тромбоциттер, СОЭ, гематокрит);
- Жалпы несеп талдауы;
- Биохимиялық зерттеулер (АЛТ, АСТ, креатинин, глюкоза, жалпы ақуыз, жалпы билирубин, несепнәр);
- Бактериоскопиялық жағынды;
- Венадан қан алу;
- Кіші жамбас ағзаларының УДЗ-сы;
- Гинеколог кеңесі.
Айта кетейік, барлық зерттеулер перзентхананың өз зертханасында жүргізіледі. Ал УДЗ-ны тәжірибелі гинекологтар жасайды. Бұл нәтижелерді барынша жедел әрі дәл алуға мүмкіндік береді.
— Әйел үшін өзі босанған перзентханада тексеруден өтудің қандай артықшылығы бар?
— Біріншіден, дәрігерлер босанудың бүкіл тарихын біледі. Екіншіден, бұл сенімді қарым-қатынас пен жеке көзқарасқа жол ашады. Әйел өзін таныс ортада жайлы сезінеді, бұл уайым деңгейін төмендетеді. Біз тек талдау жүргізіп қана қоймай, әйелді қалпына келу жолында сүйемелдейміз.
— Әңгімемізді қорытындылай келе, оқырмандарға не айтқыңыз келеді?
— Қымбатты әйелдер, босану – тек жолдың бастауы ғана. Репродуктивті денсаулыққа қамқорлық бала дүниеге келген сәтпен бітпейді. Босанудан кейінгі чекап – өзіңізге уақытында көңіл бөліп, болашақ жүктіліктерге берік негіз қалау мүмкіндігі. Өзіңіздің де, сәбиіңіздің де денсаулығы маңызды екенін ұмытпаңыз.
Алматыдағы №4 Перзентханада «Босанудан кейінгі денсаулық» бағдарламасы нәтижелі жүзеге асып келеді. Соның арқасында жүздеген әйелдер күш-қуатын қалпына келтіріп, жаңа өмір кезеңіне және болашақ жүктіліктерге дайындық жасай алды.
